LAOAG CITY – Ginutigot ni House Speaker Ferdinand Martin Romualdez ti Department of Agriculture ken dadduma pay a maseknan nga ahensya nga iyalisto ti panangbukel ti Implementing Rules and Regulations wenno IRR para iti baro a linteg a Rice Stabilization Law.
Segun ken ni Romualdez, “non-negotiable” ken napateg a maipatungpal a dagus ti linteg tapno mapatalged ti presyo ti bagas, malabanan ti hoarding, ad-adda a masuportaran dagiti mannalon ken tapno pakairanudan dagiti Pilipino kangrunaan na dagiti marigatan a gumatang ti nalaka a bagas.
Kuna ni Speaker Romualdez a no adda ti Implementing Rules and Regulations ket makagarawen ti Department of Agriculture kas iti regulasyon kadagiti bodega, ken masigurado a ti National Food Authority ket addaan ti umdas a buffer stocks manipod kadagiti lokal a mannalon.
Inpetteng na a no awan pay ti Implementing Rules and Regulations ket maibayag dagiti target ti linteg.
Innayon na a maipasigurado ti Implementing Rules and Regulations ti implementasyon ti Rice Competitiveness Enhancement Fund (RCEF) a naiyalud-od agingga intono 2031 gapu ta mausaren ti pondo para iti makinarya, bin-i, ken dadduma pay a suporta a mangpapigsa iti apit dagiti mannalon.
Mangnamnama met ti House Speaker a maaddaan ti transparency ken accountability iti panangbukel ken pannakaipatungpal ti Implementing Rules and Regulations.
