LAOAG CITY – Kumpiyansa ni Speaker Martin Romualdez nga umadu pay dagiti pagilian a sumuporta iti Pilipinas nga agturong iti kinakappia, natibker ken nadur-as nga Indo-Pacific region.
Inaramid ni Speaker Romualdez ti rakurak kalpasan a nagbitla ni Presidente Ferdinand Bongbong Marcos Jr. iti maika-21 nga International Institute for Strategic Studies-Shangri-La Dialogue idiay Singapore.
Ni Speaker Romualdez ket paset iti delegasion ni Presidente Marcos Jr. a nakipaset iti naisangsangayan nga International Institute for Strategic Studies -Shangri-La Dialogue.
Ni Presidente Marcos ti kaunaan a Presidente ti Pilipinas a nagbalin a keynote speaker iti kangrunaan a defense forum iti Asia.
Ti tema ti panagbitla ti Presidente ket ti “Seven Realities and Three Constants: Addressing the Regional Security Challenges Facing Indo-Pacific,” a mangipapay iti Pilipinas para iti kinakappia, soberania ken panangrespetar iti maipatpatungpal a linteg.
Dinayaw met ni Speaker Romualdez ti natibker a takder ni Presidente Marcos iti panangsurot iti international law, kangrunaanna iti 1982 United Nations Convention on the Law of the Sea (UNCLOS) ken ti 2016 Arbitral Award no sadino kunana a ti Pilipinas ket isu ti akin-sakup iti West Philippine Sea.
Ti panagbitla ti Presidente iti International Institute for Strategic Studies-Shangri-La Dialogue ket kagiddan ti nagbalin a rakurak ti China a mangipatungpal daytoy ti fishing ban iti West Philippine Sea ken pangta a tiliwenda dagiti ‘trespasser’ iti tagtagikuaenda a teritorio.
Namin adu metten a daras a dinungpar ken binomba ti danum ti Chinese Coast Guard ken Chinese maritime militia dagiti lugan a pangbaybay ti Philippine Coast Guard pakairamanan dagiti babassit a bangka dagiti mangngalap a Pilipino.
Iti panagbitlana, naminsan manen nga inrakurak ni Presidente Marcos ti gagem ti Pilipinas a solbaren ti parikot babaen iti diplomasia a maiyallubog iti Manila Declaration on the Peaceful Settlement of Disputes a mangitantandudu iti legal ken diplomatiko a proseso nga imbes nga agusar ti panagpangta ken kinaranggas.
Inpetteng ti Presidente ti kinapateg ti panagtitinnulong ti tunggal a rehion ken iti Asya iti panagpatalinaed ti kinakappia ken kinatibker iti Indo-Pacific. Panawagan pay ti Presidente ti natibtibker pay nga alyansa ken panagkinnammayet nangruna kadagiti pagilian a makikaykaysa iti Pilipinas iti panangsurot iti rules-based international order.
Dinakamat ni Presidente Marcos dagiti pito a topiko iti Indo-Pacific a kasapulan a solbaren nga agkakadua kas ti panangbigbig dagiti nagduduma nga interes dagiti pagilian, kompetision iti nagbaetan ti China ken Estados Unidos, kinapateg ti global commons, dagiti karit gubuay ti climate change, napartak a panagbalbaliw ti teknolohia ken kasapulan iti responsible a panangimaton iti kabaelan iti nukleyar ken militar.
Inpetteng ni Speaker Romualdez a dagiti napagsasaritaan ket masapol ti panagkaykaysa a panangtalantan ken panangsolbar iti kada pagilian iti intero a rehion.
