LAOAG CITY – Nadismaya ni House Speaker Martin Romualdez iti kinakurang ti tignay ti Department of Agriculture ken Department of Trade and Industry maipanggep dagiti ar-aramiden a pananggundaway dagiti abusado a trader ken middleman a nagresulta iti panagngina ti presio dagiti magatgatang iti merkado.
Inbatad ni Romualdez a maladingitan isuna gapu ta awan ti inaramidda dagiti opisial dagiti dua nga ahensia tapno dagus a masolbar ti panagngina ti presio dagiti basic commodities.
Inpaganetgetna a saan nga umdas ti long-term solution tapno solbaren ti adayo a diperensia ti presio ti farmgate ken retail gapu ta madagdagsenanen dagiti consumers pakairamanan dagiti mannalon ken mangngalap.
Makikoordinar met ti Speaker kadagiti sekretario ti Department of Agriculture ken Department of Trade and Industry tapno naiget nga ipatungpal dagiti pagannurutan pakairamanan ti Price Act tapno saanen a makabiktima dagiti grupo a karaman iti profiteering.
Kabayatanna, kuna ni Committee on Trade and Industry Chairman Ferjenel Biron a nakapsot dagiti opisial ti Department of Agriculture ken Department of Trade and Industry gapu ta iti baet ti prosecution ken adjudication powers ket saanda a napagsungbat dagiti immabuso a middleman ken trader.
Nadakamat iti panagdengngeg ti House Committee on Trade and Industry a naaddaan ti 200 a porsiento a mark-up iti retail manipod iti farmgate price idinto ti gross margin para kadagiti supermarket ket 8 a porsiento laeng.
