LAOAG CITY – Sinuportaran ni House Speaker Martin Romualdez ti pannawagan ti padana nga agpanpanday-linteg a ni Senior Citizens Party-list Representative Rodolfo Ordanes a siguradwen ti umdas a pondo para iti pannakaipatungpal ti Expanded Centenarian’s Act.
Ti statement ti House leader ket kabayatan ti panangselebra iti Elderly Filipino Week iti umuna a lawas ti bulan ti Oktubre.
Segun kenkuana, nasken a mabigbig isuda ken maikkan iti kanayunan a benepisyo iti babaen ti panangiyalokar iti pondo iti opisina da.
Inlawlawag pay ti House Speaker ti pannakaipatungpal ti linteg para kadagiti senior citizens a naangay ti birthday-da iti nagbaetan ti pannakaipaulog ti linteg ken pannakaipablaakna iti publiko.
Impasingkedna a napateg a saan a baybay-an dagiti senior citizens, banag a kunana a nalawag a maipakaammu iti Implementing Rules and Regulations ti linteg no sadinno nga amin a senior citizens ket masapul nga umawat ti benepisio iti naikeddeng a panawen.
Maipalagip a Pebrero 2024 idi naipasa ti linteg a mangipaay iti P10,000 kadagiti senior citizens inton agtawendan iti 80, 85, 90 ken 95.
Iti babaen ti naisingasing a 2025 budget, P3 billion ti nailatang para iti daytoy.
