LAOAG CITY – Naipaayan ti gunggona ti maysa a speaker vendor a ni Mr. Mardy Ignacio a residente iti Brgy. Palpalicong iti siudad ti Batac, kalpasan nakitana ti 45 a shabu iti igid iti kalsada Brgy. 20 iti ili ti Sarrat idi Nobiembre 7.
Daytoy ti inpakaammo ni P/Cpt Kester Arellano, chief of Police iti Philippine National Police iti nasao nga ili.
Segun kenkuana, kabayatan ti pangimbistigarda ken ni Ignacio ket inpaayanda ti cash reward a naggapu manipud iti Philippine National Police.
Kinunana a mannarimaan pay laeng ti panagiwayatda ti naun-uneg nga imbestigasion maipanggep iti narekobre a 45 a sachet ti shabu nga aggatad ti ₱102,000.
Innayonna a nakikoordinardan iti Provincial Drug Enforcement Unit no sadinno a pinasingkedanna nga awan dagiti maibilang a drug personality iti ili ti Sarrat.
Kabayatanna, agtultuloy ti pannakaiwayatda ti imbestigasion ken pannakikoordinarda kadagiti kabangibang nga ili kas iti Piddig, Dingras, ken Solsona.
Maipalagip a nakarekobre dagiti otoridad ti 45 a sachet ti mapapati a naglaon ti shabu iti igid ti kalsada partikular iti bisinidad ti Brgy. 20 iti ili ti Sarrat ditoy probinsia ti Ilocos Norte idi Nobiembre 7.
Segun ken ni Mr. Mardy Ignacio, agtawen ti 28, awanan asawa, speaker vendor, agdama a residente iti Brgy. Palpalicong iti siudad ti Batac, agtutubi manipud iti Pampanga ket nakitana dagiti naiwaras a sachet bayat ti pannagnana manipud Sto. Tomas nga agturong iti ili ti Piddig.
