LAOAG CITY – Naiteden ti gobierno lokal ditoy ciudad ti Laoag ti nasurok a 1.7-milyon a pisos nga Special Risk Allowance (SRA) dagiti 82 nga empleado ti Laoag City General Hospital (LCGH) ditoy ciudad ti Laoag.
Daytoy ket kalpasan ti sumagmamano a bolan a pannakaitantan na gapu iti nagduduma a rason.
Inyawat a mismo ni Mayor Michael Marcos-Keon ti tseke ken ni DBP Branch manager Luzviminda Buduan ken ti nasao a bangko ti nangideposit ti SRA dagiti nasao nga empleado iti bukod da a bank account.
Ti panangiyawat ni Mayor Keon ken ni Buduan ti tseke ket inimatangan da LCGH Chief of Clinics Dra. Mary Ann Luis ken Administrative Officer Mr. Ferdinand Tungpalan, karaman da City Treasurer Mr. Deomedes Gayban, City Budget Officer Ms. Nelda Casas ken ni City Accountant Ms. Loelyn Acain.
Naamoan a ti nasao a gatad ket SRA dagiti nasao nga empleado sipud idi Enero agingga iti Hunyo 2021.
Saan pay a masinunuo no kaanu a maiparuk-at ti SRA dagiti nasao nga empleado iti bolan ti Hulyo agingga iti disyembre iti napalabas a tawen.
Nailawlawag a dagiti empleado iti LCGH a naipaayan ti SRA ket isuda dagiti naipasango ken nangtaming kadagiti covid-19 patients iti nasao nga ospital.
