LAOAG CITY – Kwinestionaran ni Sangguniang Panlalawigan Member RJ Fariñas ti panagtugaw ni Senior Board Member Rafael Medina kas Presiding Officer ti Sangguniang Panlalawigan.
Segun ken ni Bokal Fariñas, basar iti nailanad iti Republic Act No. 7160 wenno ti Local Government Code no ti regular presiding officer ket absent ket nasken a maelektaran ti agbalin a temporario a presiding officer babaen ti majority votes.
Inlawlawagna a saan a kontra iti panagtugaw ni Bokal Medina kas presiding officer ngem kalikagumna laeng a masurot dagiti naiyetnag a pagannurotan.
Mainaig iti daytoy, inbatad ni Bokal Saul Paulo Lazo a pinatganda ti nasao a gagem ni Bokal Fariñas tapno pormalen a mangrugi ti pannakaisayangkat ti regular session.
Kabayatanna, maawatan met ni Bokal Medina ti nagbalin a rakurak ni Bokal Fariñas gapu ta kalikagumna laeng a masurot ti umiso a proseso iti uneg ti Sangguniang Panlalawigan.
Naammoan a ni Senior Board Member Medina ket agdama nga Acting Vice Governor ditoy probinsia kalpasan a nagturong idiay London ni Vice Gov. Matthew Marcos Manotoc para iti schooling daytoy.
