LAOAG CITY – Inkiddaw ni Sangguniang Panlalawigan Member Medeldorf Gaoat ti Ilocos Norte Police Provincial Office iti pannakaimplementar ti mandatoryo a panagisuot ti helmet iti baet nga adda pay ti pito nga ili ditoy probinsia nga awan ti mandatory wearing of helmet ordinance-da.
Daytoy ti nagbalin a kiddawna kalpasan nga adda ti nairekord ti Ilocos Norte Police Provincial Office a 134 vehicular accident ditoy probinsia manipud iti bulan iti Enero agingga iti bulan ti Agosto no sadinno kaaduan kadagitoy a naaksidente ket gapu iti saan a panagisuot ti helmet.
Kinunana a no kitkitaen ti linteg ti panagisuot ti helmet ket maysa daytoyen a national law tapnu maprotektaran dagiti motorista a makapasar iti nakana a sugat no bilangman madesgrasyada.
Inbatad met ni P/Col Frederick Obar, Provincial Director ti Ilocos Norte Police Provincial Office nga karaman kadagiti ili nga awanan ti mandatory wearing of helmet ordinance ket iti ili ti Adams, Badoc, Carasi, Currimao, Paoay, San Nicolas, ken iti ili ti Vintar.
Inlawlawagna no adda ti ordinansa ket insigida a maipaayan ti multa dagiti matiliw ngem no maibasar ti panagsita babaen ti national law ket mapilaan daytoy ti kaso iti piskal ken patienna a nabayag ti proseso.
Gutgutigutenna dagiti amin a lokal a gobierno a mangputar ti ordinansa wenno iti mismo a Sangguniang Panlalawigan maipanggep ti mandatory a panagiusot ti helmet.
Kabayatanna, inpetteng ni Obar a ti maysa kadagiti naobserabaranda ket ti panagusar iti low quality helmet dagiti kakailian ken patienna a nalaklaka ti presio ti high quality helmet ngem iti presio ti lungon.
