LAOAG CITY – Inmanihir ni Sangguniang Panlungsod Member Jason Perera ti trapiko iti paset ti Rizal Street ditoy siudad ti Laoag.
Segun kenkuana, agarup alas singko idi malem kalman, mapan koma iti farm-na iti Barangay 28 ditoy siudad ngem naobserbaranna nga awan ti agpabigay kadagiti motorista iti paset ti Bacarra Road a nangitunda ti nair-irot a taray ti trapiko.
Gapu iti daytoy, napanna in-parking ti luganna tapno isuna mismo ti agmanihir iti trapiko nangruna ket awan met ti makitana a traffic enforcer iti lugar.
Inbatadna a nagtalinaed daytoy a nangimanihir iti taray ti trapiko iti uneg ti agarup 45 a minuto tapno maalay-ayan laeng ti panagdudupudop dagiti lugan.
Inlawlawagna a kalpasan ti agarup 45 a minuto ket adda metten ti simmangpet a traffic enforcer isut gapuna a timmalawen ken nagturong iti farm-na.
Kunana a nagkiddaw pay kadagiti dua a pulis tapno matulungan ti traffic enforcer iti panangimanihir iti taray ti trapiko nga idi addada iti kalsada ket naannayas ti panagtaray ti trapiko.
Nupay kasta, apaman a nagsubli daytoy iti kalsada ket awanen dagiti pulis ken traffic enforcer a nangitunda ti in-inot manen a nagsubli iti kinairot ti taray ti trapiko isut gapuna a nagsubli manen ni Konsehal Perera iti kalsada tapno imanihir iti taray ti trapiko.
Innayonna a masapul a tumulong dagiti kapulisan no awan ti makitadan a traffic enforcer a mangmanihir iti taray ti trapiko gapu ta maibilang met dagitoy kas force multiplier.
Naammoan a saan daytoy ti umuna a daras a nangimanihir iti taray ti trapiko ni Konsehal Perera no sadinno nga addan dagiti immun-unan a panangimanihirna iti taray ti trapiko tunggal mariparna nga adda ti nakaro nga irot ti taray ti trapiko.
