LAOAG CITY – Kwinestionaran ni Sangguniang Panlungsod Member Jason Perera iti pannakaarestar ti maysa a lalaki ditoy siudad ti Laoag gapu iti maipagarup a panagikotna ti paltog.
Segun kenkuana, nangiwayat mismo isuna ti bukudna nga imbestigasion mainaig iti sangsangoen a kaso ti nasao a lalaki nga Illegal Possession of Firearms.
Inbatadna nga adu ti nakasarsaritana pakairamanan dagiti opisial ti barangay a nangala ti video recording a rumrummuar nga adu ti nalabsing a pagannurotan iti Philippine National Police.
Mainaig iti daytoy, kwinestionaran ni Konsehal Perera no apay nga idikdikket ti pulis ti paltog iti suspek a mabalin a mangitunda ti peggad iti publiko nangruna ket addada iti peryaan.
Inpaganetgetna a masapul ti ad-adu a maimuntar a Close Circuit Television wenno CCTV camera iti peryaan tapno ad-adda a makita ti situasion a mapaspasamak iti lugar gapu ta naduktalanna nga iti laeng entrance ti adda ti naimuntar a CCTV camera.
Inlawlawagna a nagkiddaw daytoy a dumawat ti kopya kadagiti nai-record a videos kadagiti body worn camera ken cellphone ti sumurok 10 a pulis a nangiwayat iti operasion ngem awan ti maipakitada kenkuana gapu ta maipagarup a naaddaan ti technical problem dagitoy.
Kunana nga adda ti agarup 25 agingga iti 30 a metro ti kaadayona manipud iti entrance ti nakaiwayatan ti operasion iti uneg ti peryaan.
Inpettengna a no adda koma pay ti CCTV camera iti uneg ken iti aglawlaw ti peryaan ket dakkel a makatulong iti imbestigasion dagiti otoridad no naimula wenno saan ti naala nga ebidensia kontra iti suspek.
Gapu iti daytoy, kalikagum ni Perera a maikkan ti tunggal maysa a pulis ti body worn camera a mangiwaywayat ti operasion para iti naan-anay a proteksion iti kapulisan ken dagiti umili.
Innayonna nga adu ti maaw-awatna nga impormasion a naimula laeng ti ebidensia iti suspek ken adda pay ti dadduma nga iggemna a video recordings a mangipaneknek nga inosente ti suspek.
Kabayatanna, inpakaammo ni P/Lt.Col. Ryan Retotar, Hepe ti Laoag City Police Station a nakadependenton ti desision ti korte no pudno a naimula dagiti ebidensia iti suspek.
Inpasingkedna nga adda ti body worn camera ti kapulisanda ngem inusar dagiti patrollers kadayta a gundaway.
Kunana a ti alternatibo nga us-usaren ti kapulisan ket dagiti alternative recording device no sadinno a ditoy a makita ti sibubukel nga istoria ti pasamak.
