LAOAG CITY – Inbatad ni Sang. Panlungsod Member Jason Perera a kasapulanen a gatangen ti lokal a gobierno ti ciudad ti Laoag dagiti lote iti Barangay 25, 26, 27, 28 nga asideg iti bypass road.
Daytoy ket kas alternatibo no saan nga anamungan ti Provincial Government of Ilocos Norte (PGIN) ti kiddaw ti lokal a gobierno ti Laoag a mailibre dagiti estudyante nu sumrek da iti Marcos Stadium nangruna no adda dagiti aktibidad ti pagadalan.
Kunana no ti magatang a lote ket isu ti pakaipasdekan ti central park ken dadduma a pay a pasdek.
Innayonna a daytoy nga addang ket kas panangsuporta na kadagiti estudyante ken kas pananganamong iti inisyatibo ni Vice Mayor Carlos Fariñas.
Mainaig iti daytoy, inpettengna a kas maysa nga opisyal ket masapul da a sigguradwen nga adda iti nasayaat a salun-at ken maiyadayu dagiti estudyante iti aniaman a bisyo iti babaen dagiti nagduduma a pasilidad nga usaren da a pag-ensayoan.
