LAOAG CITY – Inpakaammo ni Sangguniang Panlungsod Member John Michael Fariñas a ti kangrunaan a napagsasaritaanda iti naiyuswat a benchmarking-da idiay Hawaii ket maipanggep iti climate change.
Segun kenkuana, napateg daytoy a programa nga inatendaranda nangruna ket isuna ti Chairman ti Committee on Environment iti konseho ditoy siudad ti Laoag.
Inbatadna a maysa kadagiti kangrunaan nga insuroda kadakuada ket ti disaster management a mabalin a makatulong ken maiyaplikar ditoy siudad ken probinsia.
Babaen iti daytoy, kunana a nailawlawag kadakuada dagiti banag a nasken a maipakat ken maaramid no adda dagiti sumangbay a didigra ditoy siudad.
Inlawlawagna nga arig agpada met laeng ti situasion ditoy pagilian ken idiay Hawaii no sadinno a naigetda a sumursurot kadagiti maipatpatungpal a pagannurutan.
Inpannakkelna a dagiti ipangpangrunada ket dagiti pagsayaatan para kadagiti mannalon ken mangngalap tapno matulungan dagitoy no aniaman dagiti kasapulanda.
Mainaig iti daytoy, insingasing ni Konsehal Fariñas iti maysa a Council member idiay Hawaii maipapan iti single use plastic banag a maipatpatungpal ditoy probinsia.
Innayonna a masapol ti naan-anay a panagkaykaysa tapno magun-od ti panagdur-as ti maysa a lugar.
