LAOAG CITY – Inlawlawag ni Senior Board Member Rafael Chua Medina no apay a 50% laeng ti maawat a Performance Based Bonus dagiti kualipikado nga empleado ti Provincial Government of Ilocos Norte.
Segun kenkuana, basar iti DILG-DBM Joint Memorandum Circular No. 2023-001, manipud iti dati nga 65 a porsiento ket nagbalin a 50 a porsiento gapu iti pagannurotan iti Anti-Red Tape Authority a masapul nga adda ti ID a dadakkel dagiti empleado, masapul ti uniporme ken suggestion box tapno maipadanon ti napintas a serbisio kadagiti umili.
Inbatadna a daytoy ti maysa kadagiti resulta nga ad-adda pay a paigetan ti national government kadagiti local government units nga agtungpal kadagiti pagalagadan.
Inlawlawagna a saan met amin a departamento ti gobierno probinsial ti maseknan iti daytoy ngem adda laeng dagiti sumagmamano a pakaipakatanna.
Kunana a saan met a nagkurang ti panangipakaammo ti Provincial Human Resources Office kadagiti memorandum mainaig iti daytoy.
Innayonna a basar iti naisayangkat a taripnong nga indauluan ni Gov. Cecilia Araneta Marcos ket mapagbalin nga agpapadan ti uniporme dagiti amin nga empleado ti gobierno probinsial gapu ta nariparda nga agduduma dagiti uniporme ti tunggal opisina banag a masapul a mapagmaymaysan.
