LAOAG CITY – Kalikagum ni Sangguniang Panlalawigan Member Rafael Medina, chairman ti Committee on Public Works a paimbestigaran ti saan a panangikabil dagiti contractor iti early warning devices ken signages a 50-100 meters sakbay iti construction site kadagiti napasamak nga aksidente ditoy probinsia.
Daytoy ti nagbalin a kiddaw ti Sangguniang Panlalawigan iti Ilocos Norte Police Provincial Office kalpasan nga ado dagiti on-going projects kadagiti kalsada nga awan ti early warning devices iti baet nga adda ti naaprobaran nga ordinansa maipanggep iti nasao a banag.
Patien ni Medina a babaen iti daytoy a mapaspasamak ket saan a mailibak a mabalin a mangitunda daytoy ti desgrasya.
Inbatad ni P/Col Fredrerick Obar, Provincial Director iti Ilocos Norte Police Provincial Office a daytoy ti maysa kadagiti makitada a maimplementar tapnu maliklikan ti desgrasya ditoy probinsia.
Iti agdama, kinuna ni Obar nga awan pay ti datosda no mano ti bilang dagiti nadesgrasia gapu iti nadakamat a banag.
Inpettengna nga agaramidda ti survey maipanggep iti nasao a banag ken isubmitirda iti biang ti Sangguiniang Panlalawigan ken isubmitir kadagiti City ken Municipal Engineering.
