LAOAG CITY – Inbatad ni Sannguniang Panlungsod Member Jayson Perera ditoy siudad ti Laoag a kasapulan na ti nalawag a pagibasaran tapno adda ti maisyu a citation ticket kadagiti agiparada ti lugan iti sango ti pagtaengan na wenno iti arubayan.
Segun ken ni Perera, maipagarup nga obstruction ti kangrunaan a dumandanon kenkuana a rason nga ado dagiti maisyuan ti ticket ken agmulta.
Nu pay kasta, kuna na a saan a rumbeng daytoy gapu ta laketdi adda iti naituding a parking area dagiti lugan ket maipalubos.
Inbatad na a maiparit laeng ti agparking kadagiti lugar nga inkeddeng ti lokal a gobierno a saan a rumbeng a maiparada dagiti lugan.
Inpetteng na nga adda ti inyetnag a traffic and order code ti konseho nga isu ti nasken a pagibasaran.
Mainaig iti daytoy, inpakaammo ni Perera nga addan ti pannakisarita na iti mangidadaulo ti traffic division ditoy siudad.
Patien na a masapol ti panangsubli dagiti enforcers kadagiti rumbeng a masurot nu maipanggep iti panangisyu ti citation ticket ken ordinansa maipanggep iti trapiko.
Kabayatanna, kuna ni Perera a plano ti konseho nga ayaban ti head ti traffic division tapno malawlawagan ti nasao a banag.
