LAOAG CITY – Nadismaya ni Sangguniang Panlungsod Member Jason Perera ti panang-invalid ti Sangguniang Panlalawigan ti ordinansa maipanggep iti Investment Code ditoy siudad ti Laoag.
Segun kenkuana, daytoy nga ordinansa ket inamendaranda laeng kangrunaanna iti Local Investment Incentive Board Composition a naputar idi 2007 a bukbuklen ti sangapulo a miembro.
Inbatadna a saan nga umanamong ti hunta probinsial nga adda dagiti miembro ti nagduduma nga ahensia a karaman iti daytoy gapu ta addan ti naited a trabahoda.
Inlawlawagna a naamendaran daytoy gapu iti kanayon nga awan ti quorum no adda ti maiyuswat a taripnong iti tunggal tawen.
Gapu iti daytoy, inpasa ti Sangguniang Panlungsod ti nasao nga ordinansa kas urgent tapno dagus a matratar daytoy.
