LAOAG CITY – Nadismaya ni Sangguniang Panlalawigan Member Jonathan Torralba kalpasan a naammoanna nga awan ti mausar a lugan a mabalin nga usaren ti Philippine Maritime nga agkamat kadagiti agiwayat ti panagdinamita iti kabaybayan ditoy Ilocos Norte.
Segun kenkuana, naduktalanna daytoy a banag idi timmawag ti Philippine Maritime kenkuana nga adda ti maipagarup a nagpabettak ti dinamita iti likud ti Badoc Island.
Gapu iti daytoy, indatagna daytoy iti hunta probinsial tapno mapagnunumoan dagiti nasken nga addang wenno tignay nga aramiden dagiti padana nga agpanpanday linteg maipapan iti nasao a banag.
Inlawlawagna a kalikagumna nga ikiddaw iti Philippine Maritime nga adda ditoy probinsia nga adda ti highly speed boat a mausar a mangkamat kadagiti agisayangkat ti iligal nga aktibidad iti kabaybayan.
Kunana a planona nga ipakaammo daytoy a banag ken ni Gov. Matthew Marcos Manotoc tapno mapatgan ti gagemna.
Kabayatanna, mamati ni Bokal Torralba a dakkel ti posibilidadna a taga Ilocos Sur dagiti adda iti likudan ti maipagarup a panagdinamita iti ili ti Badoc gapu ta sabali ti maris ti bangka dagitoy nangruna ket adda ti color coding dagiti bangka ditoy probinsia.
