LAOAG CITY – Indeklarar ti Sri Lanka ti state of emergency kalpasan ti nalawa a layos ken mudslides iti nadakamat a pagilian.
Basar iti datos, umaboten iti nasurok a 330 a tattao ti natay idiay Sri Lanka iti maibilang kas kagrabean a weather disasters iti uneg ti sumagmamano a tawen.
Kinumpirman ti Disaster Management Centre a malaksid kadagiti natay ket adda pay ti nasurok a 200 a sabsabali ti nagtalinaed a mapukpukaw idinto nga agarop 20,000 a pagtaengan ti nadadael.
Umabot met iti 108,000 a residente ti naikabil kadagiti temporaryo a pagnaedan.
Inbatad dagiti sumagmamano nga opisyal iti Sri Lanka nga agarop a 1/3 iti pagilian ti napukawan ti suplay ti kuryente ken danom.
Mainaig iti daytoy, inrakurak ni President Anura Kumara Dissanayake a ti paspasaren da a kalamidad iti agdama ti ibilang na a kadakkelan a karit kadakuada iti pakasaritaan ti Sri Lanka.
