LAOAG CITY – Inbatad ni Mrs. Aniceta Bueno, Assistant Branch Manager ti SSS ditoy ciudad ti Laoag a kiniddaw da a saan a mai-defer ti pannakaipangato ti kontribusyon iti nasao nga ahensya.
Daytoy ket tapno agtultuloy ti pannakaipaay dagiti benepisyo nga ipapaay ti ahensya kadagiti miembro na.
Inlawlawag na a manipod iti 12 a porsiento ken mapagbalin a 13 a porsiento isut gapuna a maysa laeng a porsiento ti pagngatoan na.
Karaman kadagiti agdama benepisyo nga agtultuloy a maipaay kadagiti mangmangged ket ti sickness benefit, maternity benefit, retirement, disability ken unemployment benefit.
Innayon ni Bueno a no maiyimplementar ti pannakaipangato ti kontribusyon ket ngumato met dagiti maawat a benepisyo.
Maipalagip nga immunan a nagsurat dagiti nagduduma a grupo dagiti negosyante ken ni Presidente Rodrigo Duterte tapno saan koma pay laeng a maituloy a maipangato ti kontribusyon iti SSS ita a panawen ti pandemya gubuay ti covid-19 virus.
