LAOAG CITY – Plano ti Social Security System (SSS) a kissayan ita a tawen ti interest rate iti salary ken calamity loans basar ken ni Social Security System President ken CEO Robert Joseph De Claro.
Inbatadna a maysa daytoy kadagiti dadakkel a plano ti state-run pension fund ita a tawen tapno mapasayaat pay dagiti serbisio daytoy.
Saanna met a dinakamat no mano ti maikissay iti interest ngem iti agdama ket adda ti 10% per annum ti charge iti salary ken calamity loans iti Social Security System.
Kuna ni De Claro, ti nababbaba a borrowing costs ket mangipasimudaag a dakdakkel ti agbalin a loan proceeds.
Naammoan a gapu iti consistent ken solid performance ti investment portfolio ti Social Security System ket panawenen nga i-revisit ti interest rate ti salary ken calamity loan programs.
Malaksid iti daytoy, manamnama pay ti dadduma pay a koleksion manipud iti 1-percent contribution rate hike ita a tawen ken dagiti panagngato ti minimum ken maximum a binulan a salary credit.
