LAOAG CITY – Inlawlawag ti maysa kadagiti staff ti Veinbenidos Resort iti Brgy. Nangalisan ditoy siudad ti Laoag a kanayonda nga agdaldalus iti resort-da.
Daytoy ket kalpasan nga adda ti naawat ditoy Bombo Radyo Laoag a reklamo a maipagarup a saanda a daldalusan ti ruot nga asideg iti alad ti resort a rason nga adda ti nakitada nga uleg ken dagiti igges a makabudo.
Inbatad ti staff ti resort, kada bulan a dalusanda iti nasao resort ngem no panawen ti panagtutudo ket alisto nga agtubo dagiti ruot.
Kunana a saanda a sakup a mangdalus iti ruar nga adda iti dike wenno iti nasao a resort no sadinno nga asideg kadagiti balbalay iti nasao a lugar.
Inpalgakna nga awan ti abot iti aladda isu a mamati daytoy a saan nga aggapu iti uneg ti resort-da ti nakita nga uleg.
Mainaig iti daytoy, kuna ni Brgy. Chairman Alexander Alcid ti Brgy. Nangalisan ditoy siudad ti Laoag a saan pay a nakadanon daytoy a reklamo kenkuana.
Nupay kasta, kunana a kada lawasda met a mangisaysayangkat ti panagdalus iti uneg ti barangayda.
Inpasigurado a masolbar daytoy a parikot iti kabiitan a panawen babaen iti pannakisaritana kadagiti padana nga opisial ti barangay pakairamanan ti akikukua ti nasao a resort.
