LAOAG – Ikonkonsiderar ni Mayor Antonio Mariano iti ili ti Marcos ti panangideklarar na ti state of emergency kalpasan ti idadayyeg ti napigsa a gingined ditoy probinsya.
Daytoy ket gapu iti kaado ti perdisyon nga intunda ti napigsa a gingined iti ili ti Marcos.
Inbatad ti mayor a karaman kadagiti kangrunaan a naapektaran iti napigsa a panagdayyeg ket ti police station nga ado ti perdisyon na no sadinno a dagiti kameng ti pulisya ket nagbakwit da iti evacuation center iti nasao nga ili.
Malaksid iti kwerpo ti pulisya, inpakaammo ni Mayor Mariano nga ado pay ti perdisyon ti baro a munisipyo, auditorium, Sang Bayan Hall, ospital, dagiti rangtay, provincial roads ken dadduma pay.
Naamoan nga adda pay dagiti sumagmamano a balay iti nasao nga ili a nadadael gapu iti napigsa a gingined.
Mainaig iti daytoy, inpalgak ti mayor nga iti unos ti panagbiagna ket ti napasaran a gingined idi rabii ti martes ti ibilang na a kapigsaan a dimmayyeg ditoy probinsya.
