LAOAG CITY – Mangipaay ti State of the Province Address wenno SOPA ni Gob. Matthew Marcos Manotoc intono Agosto ita a tawen.
Daytoy ti inpakaammo ni Mr. Gervy James Gumarit, information officer III ti Communications and Media Office iti gobierno probinsyal.
Segun kenkuana, manamnama a maisayangkat ti nasao nga aktibidad intono Agosto 7 ngem adda ti posibilidad nga agbaliw ti naituding a petsa.
Inbatad na a maiyuswat ti State of the Province Address iti Plaza del Norte Hotel and Convention Center ken saan nga iti sangoanan ti kapitolio probinsial tapno saan a maapektaran ti panagannayas ti trapiko iti sentro ditoy siudad ti Laoag.
Impalgak ni Gumarit a nailungalong iti gobernador iti immun-una a gundaway a maiyuswat ti State of the Province Address na ita a bulan ngem saanna nga inanamongan gapu ta kalikagumna a maiyataday ti agbalin a report na kadagiti umili iti State of the Nation Address wenno SONA ni Pres. Ferdinand R. Marcos Jr.
Inbunannagna a maimbitaran iti nasao nga aktibidad dagiti mayor, bise mayor, kameng ti Sang. Panglungsud ken Sang Bayan ti nagduduma nga ili ken siudad ditoy probinsia pakairamanan dagiti nadumaduma a sector kas iti Department of Education, business community, agtutubo ken dagiti dadduma pay nga organisasyon.
Innayonna a manamnama a maipalaon iti State of the Province Address ti gobernador dagiti tignay nga ar-aramidenna kangrunaanna kadagiti proyekto imprastraktura kas kadagiti tallo a dadakkel a proyekto ti probinsia, infrastraktura iti benneg ti salun-at ken dagiti amin a sector ti gobierno.
