LAOAG CITY – Kinumpirmaran ni Police Captain Johnveil Maramag, ti chief of police iti ili a Marcos a pimmusayen ti STL collector a ni Mr. Marcelino Bangi Sr., agtawen iti 63, naasawaan ken taga Barangay Cacafean ti nasao nga ili.
Daytoy ket kalpasan iti sumagmamano nga aldaw a comatose iti Mariano Marcos Memorial Hospital and Medical Center idiay ciudad ti Batac.
Maipalagip a bayat ti panagawid ni Bangi idiay Barangay Cacafean a nakalugan ti motorsiklo ket nakadinnungpar na ti maysa a motorsiklo a ni Mark Alwyn Tolentino, agtawen iti 24 ken residente met iti Barangay Pacifico iti nasao nga ili.
Kuna ni Maramag nga agpapan ita ket saanda pay a nakasarita ti pamilya Bangi no ania ti plano da kalpasan a pimmusayen ti nasao a biktima.
Nupay kasta, inpasingked na a kanayun a mapan ti pamilya ni Tolentino iti ospital tapno mangipaay ti tulong para ti nasao a biktima.
Gapu ti daytoy, ibilang ni Maramag a nasolbaren ti nasao a kaso.
