LAOAG CITY – Inpakaamo ni Mrs. Mary Jane Leaño, ti Officer in Charge iti City Tourism Office ditoy ciudad ti Laoag nga agsubli ti street dance competition para iti mapaspasangasangan a selebrasion iti Pamulinawen festival ditoy ciudad.
Segun kenkuana, naurnos iti pannakaipatungpal ti nasao nga aktibidad gapu iti naiget a pannakikamayet da kadagiti barangay.
Inbatad na a 10 a cluster amin ti agbibinalubal para iti nasao a kompetisyon ken nangrugi da payen nga agsanay.
Maragsakan ni Leaño gapu ta adda iti seed money a naited kadagiti clustered barangay tapno adda iti usarenda para kadagiti kasapolan da iti nasao a kompetisyon .
Innayon na nga ammo ni Mayor James Bryan Alcid a narigat iti nasao a kompetisyon isut gapuna nga inlatangan da iti pondo ken dakdakkel daytoy no ikumpara kadagiti naglabas a tawen.
