LAOAG CITY – Naragsak nga inpakaammo ni Mr. Ruben Biacan, maysa nga Street Vendor a manipud iti dati a makilaklako laeng daytoy ket addan ti bukudna a dua a Nego-Kart wenno negosyo sa kariton iti agdama.
Inbatadna nga idi tawen 2020 ket nangrugi daytoy a makilaklako laeng ti buko juice agingga nga idi tawen 2022 ket ditoy a nangrugi a nangipasdek ti bukudna a negosio.
Kunana a narigat iti rugi ngem bayat iti panagtulid ti panawen ket nasursurona dagiti dadduma pay a klase nga street foods a mabalin nga ilakona.
Inlawlawagna a ti maysa kadagiti karigatan iti panaglakoda ket iti panawen ti panagtutudo gapu ta awan ti gumatang kadakuada.
Mainaig iti daytoy, kuna ni Biacan a kaduana ti asawana iti panaglako kadagiti street foods iti asideg ti Kapitolio Probinsial.
Innayonna a ti maysa a Nego-Kart-da nga agasawa ket maisursursor kadagiti nagduduma a barangay ditoy siudad ti Laoag babaen iti panaglako ti maysa kadagiti kaduada.
