LAOAG CITY – Inadmitir ni Police Chief Master Sergeant Harold Nicolas, ti mangidadaulo iti Provincial Drug Enforcement Unit (PDEU) a nakalibas ti subject da iti drug buy-bust operation a naisayangkat iti Barangay Ganagan, Bacarra, Ilocos Norte.
Nabigbig ti subject ti operasyon a ni Andy Lim y Violante, pintor ken residente iti Barangay Paciocan iti ili ti Bacarra.
Segun ken ni Nicolas, kalpasan a naiyawat ti suspek ti maysa a bassit a sachet a naglaon ti maipagarop a shabu iti nagpammarang a poseur-buyer ket bigla lattan a nagtaray ngem naibati na ti cellphone na ket ti inlako na.
Kuna na a kabayatan ti panangkamkamat ti poseur-buyer ti suspek ket isu metten ti panagtawag na kadakuada a backup, ngem saandan a nasurutan pay ti nagturungan ni Lim gapu ta nailet ti nailet ti nasao a lugar.
Kuna na pay nga adayo ti nagparkingan da a back-up isu a naibayag ti panagresponde da
Inbatad ni Nicolas nga inkarigatan da a biruken ti suspek ngem saan dan a nasapulan pay.
Nupay kasta, kuna ni Nicolas nga adda ti ebidensya a naala da manipod iti suspek isut gapuna nga ipilaan da latta ti reklamo babaen ti regular filing.
Naamoan a naisayangkat a ti transaksyon iti mismo a pagtrabtrabahoan ti suspek iti Barangay Ganagan iti nasao nga ili.
