LAOAG CITY – Kinumpirmaran ni Police Chief Inspector Roldan Suitos, ti chief of police iti Sarrat, Ilocos Norte a nakalibas ti nagbalin a subject da iti inyuswat da a drug buy-bust operation iti Barangay 14 ti nasao nga ili.
Binigbig ni Suitos ti subject ti operasyon a ni Jerald Ballesteros, addaan ti umno a tawen, addaan ti live-in partner ken residente ti nasao a barangay.
Segun ken ni Suitos, apaman a naiyawat ni Ballesteros ti maysa a sachet a naglaon ti maipagarop a shabu ken naawat na ti bayad na ket nadlaw na a pulis ti katransaksyon na isut gapu na a nagtaray a dagus.
Kuna na a saan a nakamat dagiti kakadwa na gapu ta maipagarop nga adda ti kadwa ni Ballesteros a naglinged ti poon ti kayo ken naminsan na a pinaputukan dagiti pulis.
Kabayatanna, naglikudan ti live-in partner ni Jerald Ballesteros ti alegasyon nga adda illegal nga aktibidad ti kadendenna na ken naglibas bayat ti naiyuswat a drug buy-bust operation iti mismo a sango ti balay da iti Barangay 14 iti ili a Sarrat.
Inlawlawag ti saanen a nabigbig a live-in partner ni Ballesteros a bayat nga agay-ayam dagiti agama na ken ti kayong na iti sango ti balay da ket adda dagiti uppat a nakasando a lallaki a nakalugan ti kotse a nagpaputok isut gapuna a nagtaray ti asawa na.
Inbatad na a gapu ti nakaro a buteng na ket napan na innala ti anak na ket nagtartaray da a napan nagpatulong iti karruba da.
Nupay kasta, kuna na a sakbay iti dayta ket sinaludlud na kadagiti uppat a lallaki no ania ti basol ti asawa na ngem saan a sinungbatan dagiti maseknan ken nagsukimat da iti uneg ken ruwar ti balay da.
Innayon na nga idi adda dagiti dimteng a pulis ket nagpaputok da manen ti namintallo a daras ken saan da a tiniliw dagiti uppat a lallaki no di ket nagkukuyog da pay a nagnagna.
