LAOAG CITY – Nagballigi ti drug buy-bust operation nga insayangkat dagiti kameng ti Philippine National Police (PNP) iti paset ti Barangay Pasaleng iti ili ti Pagudpud.
Binigbig ni Police Capt. Eduardo Santos, ti chief of police iti ili ti Pagudpud ti suspek a ni Napoleon Ganotisi y Zuniga Notorious ken High Value Target (HVT) iti drug watchlist ti PNP ken residente met laeng iti nasao a barangay.
Segun ken ni Santos, kinemmeg da ti suspek kalpasan a naglako ti maipagarop a maysa a sachet a naglaon ti maipagarop a shabu iti maysa a nagpammarang a poseur-buyer.
Innayon na nga iti pannakakapkap ti suspek ket naala pay kenkuana ti maysa a dakkel a sachet ken medium size sachet a naglaon ti maipagarop a shabu, sangaribo a pisos a nausar iti operasyon, Aluminum foil.
Malaksid iti daytoy, nakumpiskar pay dagiti otoridad iti uneg ti sling bag ti suspek ti maysa a caliber 38 a paltog, tallo a bala na, kutsilyo nga agatiddog ti 10 a pulgada ken ti nagluganan na a motorsiklo.
Maipalagip nga itay napan a bolan ket natiliw ni Ganotisi gapu iti maipagarop a panagpap-paputok na ti paltog iti Barangay Pasaleng iti ili ti Pagudpud.
Iti agdama, maisagsaganan ti reklamo a maipila kontra ken ni Ganotisi mainaig iti panaglabsing ti Republic Act (RA) 9165 wenno Comprehensive Dangerous Drugs Act of 2002 ken ti Republic Act (RA) 10591 wenno Comprehensive Firearms and Ammunition Regulation Act.
