LAOAG CITY – Inpakaammo ni Police Capt. Ireneo Sibucao Jr., ti chief of police iti ili ti Bangui a naipila dan ti kaso a panagsalungasing ti Republic Act 9165 wenno Comprehensive Dangerous Drugs Act of 2022 babaen ti regular filing iti piskalya probinsyal kontra iti suspek a ni Noel Villanueva, agtawen ti 33, residente iti Barangay Lanao iti ili ti Bangui.
Segun kenni Sibucao, kalpasan ti pannakaipila ti kaso kontra ken ni Villanueva ket insigida a nangiparuk-at ti piskalya ti subpoena tapno sungbatan ti suspek iti las-od ti sangapulo nga aldaw ti sangsangwen na a kaso.
Immuna iti daytoy, ibatad ni Atty. Jason Perera a nawaya-wayaan ti kliyente na a ni Villanueva a natiliw iti anti-illegal drug buy-bust operation a naisayangkat iti ili ti Bangui idi rabii ti Marso 11 gapu ta saan a naikamat a naipila ti reklamo iti 36 nga oras a reglementary period para iti inquest proceedings kontra iti suspek.
Maipalagip a naala iti ikot ni Villanueva ti sumuruk-kumurang a maysa a gramo a naglaon ti maipagarop a shabu nga agbalor iti 6,800 a pisos.
