LAOAG CITY – Natay ti subject ti drug buy bust operation nga inyuswat ti PNP Laoag iti paset ti bypass road a bisinidad ti Brgy. Pila ditoy ciudad.
Nabigbig ti suspek a ni Andrew Ventura alyas Andy, agtawen ti 43, awanan asawa ken residente iti Brgy. 11 ditoy ciudad ngem agdama nga agnanaed iti nasao a barangay.
Basar iti imbestigasyon, kalpasan nga inyawat ni Ventura ti maysa a sachet ti maipagarup a shabu iti nagpammarang a police poseur buyer ket dita a nangiruar ti suspek iti Calibre 45 idinto a pinaputokan na ti paltog ni P/Master Sgt. Lawrence Ganir.
Simmubot met a pinaputokan ni Ganir ti suspek babaen iti Calibre 9 mm pistol iti namintallo a daras.
Gapu iti dayta, naitaray iti Governor Roque Ablan Sr. Memorial Hospital ditoy ciudad ket dita a naideklara a dead on arrival ni Ventura.
Narekobre dagiti pulisya ti maysa a plastic box a naglaon ti 6 a sachet ti maatap a shabu ken 4 nga empty plastic sachet, sangaribo a marked money ken 1 pack ti sigarilyo ken cellphone.
Kinumpirmaran ni P/Lt. Col. Amador Quiocho, hepe ti PNP Laoag a Top 3 iti DI Watchlist ni Ventura ken repeat offender iti kaso a panaglabsing ti RA 9165 ngem nakaruar met laeng daytoy iti pagbalodan babaen iti plea bargaining.
Segun kenni Quiocho, maibilang a narisgo a tao ni Ventura gapu kadagiti kaso a sangsangoen na.
Inbatad ni Quicho a saan met a natamaan ti nagpammarang a police poseur buyer a ni P/Master Sgt. Lawrence Ganir idi pinaputokan daytoy ti paltog ni Ventura.
Innayon ni Quicho a maikonsiderar ti suspek a person of interest iti mapukpukaw a service firearm ti maysa a kameng ti pulisya idi Nobyembre itay napan a tawen.
Kunana a sinerrek ti suspek iti pagtaengan ti nadakamat a pulis agsipod ta nakaikabil iti sling bag ti paltog a nakaisab-it iti kwarto na.
Kabayatanna, Nagkamang ni Ricardo Santos Cabajar Jr, agtawen ti 25, awanan asawa ken residente iti Brgy. 37 Sangil iti ili a Bacarra iti PNP Laoag kalpasan a natakaw ti nakaparada a motorsiklo na iti sango ti pagtaenganda.
Segun kenni Quicho, nakita da a nakaparking ti natakaw a motorsiklo iti asideg ti PNP Laoag.
Maipalagip a natakaw ti motorsiklo ni Cabajar idi Disyembre itay napan a tawen ket ditoy a dagus binigbig ti biktima a ni Ventura iti nangitaray ti motorsiklo na.
Inlawlawag na a nakilugan kenkuana ni Ventura manipod Brgy. 1 ditoy ciudad ken napan da iti maysa a convenience store ket idi nagsardeng da iti paset ti bypass road iti Brgy. 47 ditoy ciudad ket intaray ti suspek iti motorsiklo ni Cabajar.
Naipila iti kaso a panaglabsing ti RA 10883 wenno New Anti-Carnapping Act of 2016 kontra kenni Ventura.
Iti agdama, naipakustodyar pay laeng iti PNP Laoag ti motorsiklo ni Cabajar agsipod kukua daytoy ti kabsat na.
