LAOAG CITY – Kinumpirmaran ni P/Lt. Col. Amador Quiocho, Chief of Police iti PNP Laoag a karaman iti Top 10 Provincial Target Level ken dati a drug surrender ti naiyuswatan a subject ti drug buybust operation iti Brgy. 28 ditoy ciudad ti Laoag.
Nabigbig ti suspek a ni Victorino Teñeda Jr. y Andres, agtawen 28 ken residente iti Brgy 52-B Lataag ditoy siudad.
Segun kenni Quiocho, nabayagen a sipsipotan dagiti otoridad ni Teñede.
Inbatad na nga inadmitir ti suspek nga aglaklako daytoy iti ilegal a droga.
Kunana a posible a naaramid daytoy ni Teñeda kalpasan a nagsina ti asawana.
Naamoan nga ayuyang ti suspek a mapmapan iti lugar a nakatiliwanna.
Maipalagip a natiliw ni Teñeda kalpasan a nakagatang ti nagpammarang a gumatang ti iligal a druga ti maysa a sachet a naglaon ti maipagarup a shabu iti balur a sangaribo a pisos manipid iti suspek.
Malaksid iti daytoy, narekobre dagiti otoridad ti lima a sachet a naglaon ti maipagarup a shabu agraman ti buybust money.
