LAOAG CITY – Inlawlawag ni Police Chief Master Sergeant Harold Nicolas, mangidadaulo iti Provincial Drug Enforcement Unit a nabayagen a kinatransaksiyon da ti subject ti buy bust operation a natiliw iti Brgy. San Marcos iti ili ti San Nicolas.
Kuna na a nabayag a kinatransak da ni Michael Cristobal mainaig iti panaglako iti paltog ngem idi laeng kalman a natiliw daytoy.
Segun kenni Nicolas, maibilang pay nga street level individual iti INPPO ni Cristobal mainaig iti iligal a druga.
Inbatad na a saan da a namnamaen a nakakita da ti maipagarup nga iligal a druga iti ikot ni Cristobal gapu ta panaggatang ti paltog ti target iti transaksiyon.
Naplano iti operasyon a gumatang da iti kalibre 38 a revolver wenno kalibre 45 a paltog ngem nagtennag a kalibre 22 ti adda nga ilako ni Cristobal iti nagpammarang a gumatang ti paltog.
Karaman a nasukimat da dagiti sumagmamano a sachet a naglaon ti maipagarup a shabu iti uneg ti pakete ti sigarilyo ni Cristobal kabayatan iti panangkapkapda kenkuana.
Innayon ni Nicolas, a babaen iti validation ket saan nga aglaklako ni Cristobal iti iligal a druga ngem ketdi agus-usar daytoy.
Mainaig iti daytoy, iyur-uray ni Nicolas, ti resulta ti drug test ni Michael Cristobal kalpasan a natiliw babaen ti gun buy bust operation ilti ili ti San Nicolas.
Daytoy ket kalpasan a naglikudan ni Cristobal a kukua na ti sachet a naglaon ti maipagarup a shabu a nakumpiskar dagiti otoridad manipud iti ikot daytoy.
Kabayatanna, inpetteng ni Nicolas a nakita da iti ikot ni Cristobal ti paltog a naplano nga ilako na iti nagpammarang a gumatang iti iligal a paltog.
Kuna na a saan da nga inmula dagiti ebidensya a naala manipud iti ikot ni Cristobal.
Agtultuloy ti imbestigasyon da mainaig iti pagal-alaan ni Cristobal iti paltog.
Maipalagip a nakumpiskar dagiti otoridad iti operasyon dagiti sumagmamano a sachet a naglaon ti maipagarop a shabu, maysa a paltog a revoler nga a addaan ti tallo a bala, kwarta, immuko ken dadduma pay.
