LAOAG CITY – Pimmusay ti subject ti drug buybust operation a naiyuswat iti Sitio Uno, Brgy. Balacad ditoy siudad ti Laoag idinto a nasugatan ti maysa a pulis kalpasan nga adda ti napasamak a shootout.
Nabigbig ti pimmusay a suspek a ni Ruel Adaon, residente iti ili ti Solsona ngem tubo iti ili ti Pasuquin idinto a ti pulis ket ni PSSgt. Ver Suarez, maysa a kameng ti PDEU.
Basar iti nakalap nga impormasyon ti Bombo Radyo Laoag, bayat a maiyus-uswat ti transakyon ket dita a nadlaw ti suspek a pulis ti katransaksyon na rason nga inasot na ti paltog na ket dita a pinaputukan na ti pulis a nagpammarang a posuer buyer ken natamaan ti bukot daytoy.
Gapu iti daytoy, pinaputokan met dagiti back-up a kameng ti PDEA ken PNP ti suspek ken nataaman ti barukong na.
Dagus a naitaray ti pulis ken ti suspek iti ospital ngem dead on arrival ti suspek idinto a maipagarop a nakasuot ti bullet proof vest ti pulis.
Kabayatanna, inpakaamo ni PLt. Col. Rafael Lero, ti hepe ti PNP-Laoag a ti suspek ket adda iti regional target level nu sadino a ti operasyon daytoy ket ditoy probinsya, iti probinsya ti Ilocos Sur ken La Union.
Iti agdama, agtultuloy ti imbestigasyon ti SOCO iti nasao nga insidente.
