LAOAG CITY – Nagpositibo iti drug test ti subject ti search operation a ni Macren Balbarez iti Barangay 1 ditoy ciudad ti Laoag.
Daytoy ti kinumpirmaran ni Police Lt. Col.Joseph Baltazar, ti chief of police ditoy ciudad ti Laoag.
Mainaig iti daytoy, inpakaammo ni Baltazar a pinilaan da ni Balbarez iti panaglabsing iti Republic Act 10591 wenno Comprehensive Firearms and Ammunition Regulation Act ken panaglabsing iti Republic Act 9165 wenno Comprehensive Dangerous Drugs Act of 2002.
Maipalagip a iti pannakaisayangkat ti operasyon iti balay da Balbarez ket nakakumpiskar dagiti otoridad iti kwarto ti suspek iti maysa a dakkel a supot a naglaon ti tangkay ti maipagarop a marijuana ken 10 a sachet ti maatap a napagango a bulong ti marijuana, maysa a bala ti MDC 1945 20mm mk-3 ken drug paraphernalia.
Immunan nga inpetteng ti suspek a naimula amin dagiti nakumpiskar dagiti otoridad nga ebidensya iti kwarto na.
Nupay kasta, inpetteng ni Police Major Carlo Abing, ti deputy chief of police ditoy ciudad ti Laoag a nabayag a minonmonitor da ti suspek sakbay nga insayangkatan da ti operasyon.
