LAOAG CITY – Nasakit ti nakem dagiti naiyuswatan ti search warrant operation a supporters ti team Fariñas nga isuda kapitan Felimon Balgona ti Brgy. Estancia iti ili ti Piddig ken ni brangay Tanod Remarton Ocampo iti Brgy. 26 ditoy siudad ti Laoag.
Segun ken ni Balgona, nu pay nawaya-wayaan manipod ti pannakaibalod na kalpasan a nakapagpiyansa babaen iti tulong tni dati a Cong. Rudy Fariñas ket saan na a malipatan ti nagbalin a pasamak idi naiserbian ti search warrant.
Inbatad na nga adda dagiti tallao a lallaki nga immuna a simrek iti pagtaenganda ken naglalaban da.
Kuna na a gapu ta dadakkel dagiti nakasango na a lallaki ket saan a nakagaway agingga a ginundawayan dagitoy ti nagimula ti ebidensya sakbay a naiyuswat ti operasyon.
Inbatad na nga iti manon a tawen a panagserbi na kas opisyal, ita laeng a mapasamak ti arig a pannakaabuso ken pannaka-harass na kageddan ti pannakapabasol na iti saan na nga aramid.
Kabayatanna, maluksaw met ni Ocampo kadagiti pulis gapu ta arig a nababoy pakairamanan ti pamilya na idi naiserbian ti search warrant.
Inpakaammo na nga adda iti uneg ti banyo idi adda dagiti simrek iti pagtaenganda ken binirok da daytoy agingga a pinaruar da.
Kuna na a karaman ti asawa ken dagiti annakna a pinaruar dagiti simrek a pulis.
Kalpasan ti sumagmamano a minutos, inbatad ni Ocampo a rimuar dagiti pulis a maipagarop a nagimula ti ebidensya ken kadayta a gundaway laeng nga inawagan da dagiti opisyal ti barangay pakairamanan dagiti pulis a nagiyuswat ti operasyon.
Maipalagip a kalpasan ti operasyon idi Abril 26 ket nadiskobre dagiti otoridad ti sumagmamano a sachet ti iligal a forga ken paltog iti pagtaenganna.
Kalikagum ti team Fariñas a maisardeng ti aniaman a klase na ti panagimula ti ebidensya ken masurot dagiti ibagbaga ti linteg.
