LAOAG CITY – Kinumpirmaran ni Barangay Chairman Ruben Roque iti Barangay 46, Nalbo ditoy ciudad ti Laoag nga adda ti naireport kadakuada a panangipangta ni Froilan Suniga, tubo iti ili ti Dumalneg.
Ni Suniga ket isu ti subject ti search warrant operation iti maysa nga apartment iti Barangay 50, Buttong ditoy ciudad.
Segun kenni Roque, idi Mayo 14 ket nagreport kadakuada ti agnagan ti Francisco Vidad ken Roy Salabaw a taga Barangay Cabungaan citoy ciudad gapo ta maipagarop a pinangtaan isuda ni Suniga.
Inbatad na a basar iti palawag dagiti maseknan, pinangtaan ni Suniga a paltogan na dagitoy no ituloy da ti trabaho da partikular ti maar-aramid nga alad.
Kuna ti kapitan a ti maar-aramid nga alad a kukua ti kabsat ni Suniga ket dati a naipatrabaho kenkuana ngem saan a nagtuloy gapo ta mabalin a naikkat ti panagtalek da kenkuana.
Naamoan a kalpasan ti panagipangta ti Suniga ken ti panagreport dagiti maseknan iti barangay ket saanen a naulit pay agingga a nagbalin daytoy a subject iti operasyon idi laeng rabii.
