LAOAG CITY – Mangiruaren ti Department of Justice (DOJ) ti subpoena kontra kadagiti indibidual a karaman iti lima a kaso nga adda ti pakainaiganna iti maanomalya a flood control projects idiay Bulacan.
Insubli dagitoy a kaso ti Office of the Ombudsman iti Department of Justice tapno isuda ti mangituloy ti case build-up ken imbestigasion.
Inbatad ni Prosecutor General Richard Anthony Fadullon a karaman ditoy dagiti dati nga engineer ti Department of Public Works and Highways nga isuda Henry Alcantara, Brice Hernandez ken Jaypee Mendoza.
Iti baet daytoy, kuna ni Fadullon nga awan ti karaman nga agpanpanday linteg, senador man wenno kongresista iti agdama.
Saan pay a karaman ditoy ti agasawa a contractor nga isuda Curlee ken Sarah Discaya.
Naminsan manen nga inpetteng ti Justice Department nga agtultuloy ti imbestigasion uray awan dagiti testimonia dagiti Discaya.
