LAOAG CITY – Maysa a car museum idiay Hyderabad, India ti nakairekord ti world record gapu kadagiti lugan a makita ditoy.
Kinumpirmaran ti records keeping organization a Guinness World Records a ti museum a Sudhakar’s kaleidoscopic Sudha Cars Museum ti baro a record holder ti titulo a “Largest Collection of Wacky Vehicles in a Museum” gapu iti naidumduma a koleksion daytoy a 57 oddly shaped cars.
Segun iti akinkukua ti museum a ni Sudhakar Kanyaboyina, nangrugi laeng daytoy nga agrapaap idi ubing isuna a makaaramid ti lugan iti nagduduma a sukog kas ti hamburger, sapatos, basketball ken dadduma pay.
Ni Sudhakar ti nangaramid kadagiti amin a lugan a masarakan iti museum-na nupay awan ti mechanical engineering background-na.
Kuna ni Sudhakar, naragsak isuna gapu ta nabigbig iti intero a lubong iti babaen ti Guinness World Records ti museum-na.
Inlawlawagna a no iti dati ket elementary students nga ag-field trip laeng ti agturturong iti museum-na, itan ket karaman payen dagiti foreign tourists ket kalikagumda a makita dagiti napartuatna a lugan.
