LAOAG CITY – Natalged a naibakwit ken dagus a naikkan ti medical attention ti maysa a navy personnel a nagsagaba ti nakana a sugat gapu iti intensional a panangdungpar ti China Coast Guard kadagiti suldado a mangisaysayangkat laeng ti Rotation and Resupply mission iti BRP Sierra Madre a naka-station iti Ayungin Shoal.
Daytoy ti inrakurak ni Armed Forces of the Philippines Public Affairs Office Chief Col. Xerxes Trinidad.
Segun ken ni Col. Trinidad ti agtultuloy nga agresibo a tignay ken unprofessional nga addang ti China Coast Guard kontra iti maysa a legitimate humanitarian mission ket saan a nainkalintegan.
Nasken nga agbalin a kalmado dagitoy tapno saanen a kumaro pay ti tension iti paset ti West Philippine Sea.
Inpasigurado met ni Col. Trinidad a nagtalinaed a committed ti Sandatahang Lakas ti Pilipinas a pagtalinaeden ti presensia daytoy iti West Philippine Sea a sumursurot iti international a protektaran ti kabaybayan, karebbengan ken ti masakbayan dagiti Pilipino.
Saan met a dinakamat ti Armed Forces of the Philippines
no mano a suldado ti navy ti nasugatan iti insidente ngem maibasar iti reliable source ket adda ti pito a navy personnel ti nasugatan.
Iti baet ti insidente iti Ayungin Shoal idi Lunes, nangisayangkat ti Armed Forces of the Philippines ti multilateral maritime cooperative activity pakairamanan ti United States, Japan ken Canada iti paset ti West Philippine Sea.
Nakipaset iti joint maritime exercise ti Gregorio del Pilar-class patrol ship ti Armed Forces of the Philippines ti BRP Andres Bonifacio (PS17), U.S. Navy Arleigh Burke-class guided-missile destroyer USS Ralph Johnson (DDG 114), Japan Maritime Self-Defense Force Murasame-class destroyer JS Kirisame (DD-104) ken ti Royal Canadian Navy Halifax-class frigate HMCS Montreal (FFH 336) a nagkakadua a naglayag iti West Philippine Sea.
Gagem ti nasao nga exercise nga ipakita ti commitment ti Armed Forces of the Philippines pakairamanan dagiti kaalyado daytoy a mapagtalinaed ti peace and security iti Indo-Pacific Region.
