LAOAG CITY – Kinumpirmaran ni Mayor Antonio Mariano iti ili ti Marcos a positibo iti African Swine Fever dagiti sumagmamano a baboy a naalaan ti sample iti Brgy. Elizabeth iti nasao nga ili.
Nu pay kasta, inbatad na nga agpapan ita ket awan pay ti masinunuo a bilang dagiti naapektaran a baboy wenno ti bilang dagiti maikali.
Kuna na nga agtultuloy ti panagsursor dagiti pannakabagi ti veterinary office, dagiti kameng ti department of Agriculture pakairamanan dagiti kameng ti PNP iti nagduduma a pagtaengan partikular dagiti agtartaraken ti baboy iti nasao a barangay.
Mailagip nga adda dagiti timpuar a report mainaig iti pannakaikali ken pannakatay dagiti sumagmamano a baboy iti Brgy. Elizabeth.
Gapu iti daytoy, dagus nga indauloan ni Provincial veterinarian Dr. Loida Valenzuela ti pannakaala ti sample dagiti sumagmamano a baboy tapno madeterminar nu adda ti apektado ti ASF.
