LAOAG CITY – Kinumpirmaran ni Mayor Rene Gaspar iti ili ti Carasi nga adda dagiti sumagmamano a baboy a pimmusay iti nadakamat a lugar.
Segun kenkuana, gapo iti daytoy ket nangala ti sample kadagiti baboy dagiti kameng ti Provincial Veterinarian tapno maipadalan iti eksaminasyon.
Inlawlawag ti mayor a dagiti pimmusay ket dagiti baboy a nabayagen a saan a mangmangan.
Nupay kasta, kunana a maipadalan latta ti sample iti eksaminasyon tapno masigurado no negatibo wenno positibo dagitoy iti African Swine Fever (ASF).
Mainaig iti daytoy, kunana nga adda ti tallo nga Animal Quarantine Checkpoint a naestbalisar tapno mamonitor ti pannakairwar wenno pannakaiserrek ti baboy iti ili da.
Kabayatanna, kunana a nakasagana met ti lokal a gobierno a tumulong no bilang man positibo iti ASF dagiti naipadalan iti eksaminasyon.
Mangnamnama met daytoy a negatibo iti ASF dagiti baboy a naipadalan iti eksaminasyon.
