LAOAG CITY – Inbatad ni P/Cpt Kester Arellano, hepe ti Philippine National Police iti ili ti Sarrat nga umabot ti sumurok kumurang 5k nga tattao ti immay nagturong iti Sarrat Public Cemetary ita nga aldaw tapnu bisaten ti tanem dagiti ay-ayatenda iti biag a pimmusayen.
Segun kenkuana, adda ti 8 a tanod iti kada barangay ti nagbalin a katulunganda nga agmonitor iti kamposanto iti nadakamat nga ili.
Adda ti nakumpiskar dagiti otoridad a loud speakers manipod kadagiti napan bimmisita.
Malaksid iti daytoy, adda dagiti nakitada a nangiserrek ti arak kas iyatangda, nupay napalubosan daytoy ket sinigurado dagiti otoridad a saan nga mainum iti uneg ti sementerio.
Innayonna nga adda met ti dua nga indibidual a nairekord a naulaw gapu iti napudot a panawen.
Kabayatanna, nagtalinaed a nakaalerto dagiti kameng ti Philippine National Police, Bureau of Fire Protection ken health units tapno mapagtalinaed ti linak, urnos, ken talna ita nga Undas 2024.
