LAOAG CITY – Balligi a naiyawat ti tulong kadagiti benepisyaryo ti nairubuat a 5Ps Project wenno (Pabahay, Pailaw, Patubig, Pantawag, Palikuran) ken Pangkabuhayan ni Manong Pulis iti ili ti San Nicolas.
Segun ken ni PMaj. Joseph Tayaban, hepe ti PNP-San Nicolas, maysa ti Muslim Community iti Brgy. 20 iti nasao nga ili ti nagbalin a benepisyaryo ti pabahay ken patubig a paset ti programa.
Inbatad na a malaksid iti pabahay ket iti met Brgy. 3 ti naipaayan ti libre a pailaw.
Mainaig iti daytoy, inpakaammo na a naited ti pangkabuhayan kadagiti tallo a pamilya iti Brgy. 18 nu sadino a nakaawat dagitoy ti taraken a pato idinto sumagmamano a pamilya met iti Brgy. 21 ti nakaawat ti taraken a kalding.
Segun ken ni Tayaban, saan nga agballigi ti pannakaipatungpal ti 5Ps nu awan ti tulong dagiti nagduduma nga advocacy groups.
Innayun na a daytoy ket pakairamanan ti panangidalo ni PNP Reginal Director Pol. Brigidier Gen. Emmanuel Peralta ken ni Provincial Director Police Col. Julius Suriben.
