LAOAG CITY – Inpakaammo ni Bombo International News Correspondent Rene Ballenas manipud idiay Estados Unidos nga adda dagiti sumagmamano a baro a pagannurutan ti nasurot iti naisayangkat nga umuna a Presidential Debate iti nagbaetan da dati nga United States President Donald Trump ken United States Vice President Kamala Harris para iti United States Election.
Segun kenkuana, awan ti audience a napan nagbuya iti studio no sadinno ket uppatda laeng pakairamanan dagiti dua nga host ken dagiti dua a kandidato.
Inbatadna no agsarita ti maysa a kandidato ket naka-turn off ti mikropono ti maysa met a kandidato tapno maliklikan nga agsarita ti kandidato a saanna met pay a batang ti oras nga agsarita.
Inlawlawagna a dagiti kangrunaan a napagsasaritaan iti debate ket ti maipanggep iti abortion ken In vitro fertilization.
Malaksid iti daytoy, kuna ni Ballenas a naikkan pay ti importansia ti maipapan iti immigration no sadinno a naiget a mapagsasaritaan ti nagbedngan ti Estados Unidos ken Mexico, panangsuporta ti Estados Unidos iti gubat iti Gaza, problema iti inflation, demokrasia ken dadduma pay.
Kunana a ti saan a naliklikan ti nasao a debate ket ti panagbinnara ti dua a partido ken ti personal attack a panagsinnungbat dagiti kandidato.
Innayonna a ni Harris ket nagserbi kas Prosecutor sipod pay idi nagturpos isuna iti Law School, District Attorney iti dua a termino, Attorney General iti tallo a termino, Senador ken Bise Presidente no sadinno adda ti 34 a tawen a nagserbi daytoy iti gobierno idinto a ni Trump ket nagserbi kas Presidente iti Estados Unidos idi 2016 iti maysa laeng a termino.
