LAOAG CITY – Napilaan ti kaso ti sumagmamano a dati nga opisyal iti ili ti Marcos kalpasan ti maipagarop a pananggamgam da ti sumagmamano a paset ti lote a nakaipatakderan ti merkado publiko.
Inpakaammo ni Mayor Antonio Mariano iti ili ti Marcos a ginamgam dagiti maseknan ti nasao a paset ti lote babaen ti pananginagan da iti bukod da a bagi.
Segun iti mayor, idi katugtugaw na kas mayor iti ili ti Marcos ket kinasarita na dagiti maipagarop a nanggamgam ti sumagmamano a paset ti lote iti merkado publiko tapno isubli da ti tinagikua da a sanikua ti gobierno lokal iti nasao nga ili.
Inkari pay ti mayor a sukatan na no isubli dagiti maseknan ti innala da a paset ti lote iti merkado publiko ngem adda latta dagiti nagkedked, rason a pinilaan na dagitoy ti kaso iti Ombudsman.
Innayon na nga adda dagiti nangisubli ngem ti pinaruwar da metten nga indonar da ti lote.
Inlawlawag ni Mayor Mariano a plano da a pa-renovate ti merkado publiko iti ili ti Marcos ngem gapu iti nasao nga isyu ket saan da paylaeng a maipatungpal.
