LAOAG CITY – Naisublin dagiti sumagmamano a dokumento nga iggem ni Mrs. Evelyn Manuel ti Barangay Treasurer ti Barangay Cataban ditoy siudad ti Laoag a nagkurakot ti pundo ti barangay.
Segun ken ni Barangay Chairman Bryan Batulayan iti nasao a barangay, saan pay a kumpleto dagiti nai-turn over kadakuada gapu ta adda pay dagiti files a maala ngem iyur-urayda laeng ti pananggatang ti flashdrive tapno ditoy a maipasa dagiti napapateg a dokumento iti nasao a barangay.
Inbatadna a desidido isuna ket dagiti kakaduana nga opisial ti barangay a pilaan ti kaso ti Barangay Treasurer gapu iti panangalana ti pundo ti barangay.
Inlawlawagna a maiyur-uray laengen ti statement manipud iti Commission on Audit tapno naan-anayen daytoy a makasoan.
Mainaig iti daytoy, inpanamnama ti Barangay Treasurer nga in-inot a bayadanna ti kuarta nga innalana.
Kabayatanna, pinadas ti Bombo Radyo Laoag News Team nga alaen ti takder ti nasao a Barangay Treasurer ngem nagkedked daytoy a mangipaay ti aniaman a komento.
Maipalagip a kinumpirmaran ni Kapitan Batulayan nga umabot iti 256 a ribu a pisos nga in-inot nga inruar ti Barangay Treasurer babaen ti 2024 budget ti barangay.
