LAOAG CITY – Inbatad ni Mr. Nelson Silvestre, ti bise presidente iti Laoag-Batac-Paoay Terminal a nakaro a padagsen kadakuada ti dakkel a nagngatoan ti presyo dagiti produkto a petrolyo.
Segun kenni Silvestre, marigatan da unay iti agtultuloy a panagngato ti presyo dagiti prosukto a petrolyo nangruna ket saan met ngumina ti plete.
Inlawlawag na a saan laeng met a presyo ti produkto a petrolyo ti ngumina no diket sumurot met ti presyo dagiti pyesa dagiti lugan a gatangen da no agperdi.
Kunana pay a gapo iti daytoy ket adda ti ipatpatungpal da a coding gapo ta no agpasada da amin ket posible nga awan ti mapasadaan dagiti dadduma.
Mainaig iti daytoy, kalikagom da a matratar daytoy iti kabiitan a panawen tapno maalay-ayan ti epekto ti nangina a presyo ti produkto a petrolyo kadakuada.
Inpetteng na nga uray saanen nga agkiddaw dagiti drivers ken operators ket otomatiko kuma a tamingen dagiti maseknan a personalidad ken ahensya kas tulong metten kadakuada nangruna ket nabayagen ti sursurten da a fare guide.
Kabayatanna, inadmitir na a ti ammo na ket saan pay nga ita nga aldaw ti pannakaipatungpal ti dakkel a nagngatoan ti presyo.
