LAOAG CITY – Nakirambak dagiti sumagmamano a Filipino-Chinese ditoy siudad ti Laoag iti naiyuswat a Dragon Dance para iti Chinese New Year ita nga aldaw, Enero 29.
Segun ken ni Atty. Calvin Pascual, Secretary ti Filipino Chinese Chamber ditoy probinsia, ti pannakaselebrar ti Chinese New Year ket maysa kadagiti kapatgan a tradision para kadakuada kas maysa a Chinese.
Inbatadna a kas met kadagiti Pilipino nga adda dagiti pammati nga ar-aramidenda no madanon ti panangsarabo ti baro a tawen.
Inlawlawagna a para kadakuada nga Intsik ket adda ti maiyuswat a reunion dinner iti bisperas ti Chinese New Year, adda dagiti maidasar nga agbubukel a prutas iti lamisaan, mangikabil ti ampao, agdekorar ti nalabbaga a parol iti uneg ti pagtaengan ken dadduma pay.
Innayonna a mangnamnama daytoy nga ita a Year of the Snake ket ad-adda pay nga umasideg ti parabor iti pamiliana ken negosiona.
Kabayatanna, inpakaammo ni Ms. Amy Go, maysa kadagiti aglaklako ti lucky charms ditoy siudad ti Laoag a napeggad ita a tawen para kadagiti naipasngay iti Year of the Tiger.
Nupay kasta, ginutigotna nga agusar ti hulu tapno maprotehiran isuda ti aniaman a klase ti sakit ken maiyadayo dagitoy iti malas.
