LAOAG CITY – Inpakaammo ni Bombo International News Correspondent Mrs. Vilma Cabuloy McDaniel iti North Carolina, a nakasagana dan sakbay iti isasangpet ti snow storm iti nasao a lugar.
Kuna na a nakagatangen kadagiti kangrunaan a kasapulan da kas iti danum, heater, makan, gasolina ken generator set gapu ti possible a panagpukaw ti kuryente.
Inbatad ni Mrs. McDaniel nga addaan da pay ti supply ti kandela, flashlight ken baterya ken dadduma pay a kasapulan da.
Segun kenni McDaniel, possible nga umabot iti nasurok maysa a kadapan ti kabengbeng ti yelo nga iparnuay ti snow storm.
Kinumpirmaran na pay a nakanselaren ti panagtrabaho dagiti mangmangged kas kenkuana.
Inpakaammo na nga umaboten ti 72,442 a pagtaengan dagiti naawanan ti kuryente kadagiti lugar a maap-apektaran ti panagtudo ti yelo.
Inbatad ni Mrs. McDaniel a ti panniempo na iti agdama ti kakaruan a kalamidad a mapaspasaran da.
Maipan met dagiti homeless kadagiti maar-aramat nga evacuation centers babaen ti panangibakwit dagiti otoridad.
Innayon na nga umab-aboten ti 20 degree fahrenheit wenno kaibatugan ti -6 degree celsius.
